පවතින අයහපත් කාලගුණික තත්ත්වය හේතුවෙන් ධාවනය වෙමින් තිබූ දුම්රියක් මතට හදිසියේම ගසක් කඩා වැටී ඇති බව වාර්තා වේ. මේ හේතුවෙන් ප්‍රධාන මාර්ගයේ දුම්රිය ගමනාගමන කටයුතුවලට තාවකාලිකව බාධා එල්ල වී ඇත.
මෙලෙස අනතුරට මුහුණ දී තිබෙන්නේ කොළඹ කොටුව දුම්රිය ස්ථානයෙන් පස්වරු 5.10 ට රඹුක්කන බලා ගමන් ඇරඹූ දුම්රියයි. මෙම දුම්රිය පොල්ගහවෙල දුම්රිය ස්ථානය වෙත ළඟාවෙමින් තිබියදී මාර්ගය අසල තිබූ ගසක් මෙලෙස ඒ මතට ඇද වැටී ඇති බව දුම්රිය දෙපාර්තමේන්තුව සඳහන් කළේය.
මගීන්ට හානියක් නෑ, මාර්ගය යථා තත්ත්වයට ගැනීමේ වැඩ අරඹයි
අනතුර සිදුවන අවස්ථාවේ දුම්රිය ධාවනය වෙමින් තිබුණද, කිසිදු මගියෙකුට කරදරයක් හෝ හානියක් සිදුව නොමැති බව වාර්තා වේ.
ප්‍රධාන මාර්ගයේ ගමනාගමනයට සිදුව ඇති බාධාවන් කඩිනමින් ඉවත් කිරීමට බලධාරීන් පියවර ගෙන තිබේ. ඒ අනුව මාර්ගය යථා තත්ත්වයට පත් කිරීම සඳහා දුම්රිය සේවකයින් එම ස්ථානයේ කටයුතු කරමින් සිටින බව වැඩිදුරටත් වාර්තා වේ.
